תענית, פרק צווייטער, משנה ז'. אין דער פריערדיקער משנה האבן מיר גערעדט וועגן דעם מצב פון די כהנים אינעם משמר וואס טוט די עבודה אינעם בית המקדש אין דער וואך אין וועלכער עס פאלן די תעניות, און וועגן דעם מצב פון די אנשי בית אב - די כהנים וואס טוען די עבודה אין יענעם באשטימטן טאג פון דער וואך. אונדזער משנה זעצט פאר מיטן זעלבן ענין, און דן זיך אין די דינים וואס נוהג זענען ביי זיי במשך פונעם גאנצן יאר.
דער דין פון טרינקען וויין:
"אנשי משמר מותרים לשתות יין בלילות אבל לא בימים" - די כהנים פונעם משמר פון יענער וואך מעגן טרינקען וויין ביינאכט, ווארום כאטש עס קען זיין אז מען וועט זיי דארפן צו העלפן אין דער עבודה פונעם בית המקדש ווען די עבודה איז פיל צופיל פאר די אנשי בית אב, קומט דאס פאר בלויז ביי טאג און נישט ביינאכט. ביי טאג אבער איז זיי אסור צו טרינקען וויין, ווייל ווער עס האט געטרונקען וויין טאר נישט טאן די עבודה אינעם בית המקדש.
"ואנשי בית אב לא ביום ולא בלילה" - די כהנים פונעם בית אב, וואס טוען די עבודה אין יענעם טאג, זענען אסור צו טרינקען וויין ביי טאג, בשעת זיי זענען פארנומען מיט דער עבודה, און אויך ביינאכט, ווייל עס קען זיך מאכן אז מען וועט דארפן טאן עבודה אויך ביינאכט - ובפרט אז אסאך כהנים פלעגן ארויפטראגן די חלבים און די אברים פון די קרבנות פונעם טאג במשך פון דער גאנצער נאכט.
דער איסור פון האר שנייַדן און וואשן:
"אנשי משמר ואנשי מעמד אסורין מלספר ומלכבס" - דער איסור חל אי אויף די כהנים פונעם וועכנטלעכן משמר, אי אויף די אנשי מעמד: יענע ישראלים וואס פארטרעטן כלל ישראל אין יענער צייט, און זענען פארהאן בשעת מען מקריב איז די קרבנות. דער טעם דערויף: כדי זיי זאלן נישט אפלייגן די זאכן אויף דער צייט ווען זיי דארפן זיין פארנומען מיט די קרבנות, נאר זיי זאלן פאראויסטאן און טאן דאס פריער, און אריינגיין אין דער וואך שוין מיט אפגעשוירענע האר און אויסגעוואשענע בגדים.
"ובחמישי מותרין" - אום דאנערשטאג איז זיי דערלויבט צו שנייַדן די האר און צו וואשן, מפני כבוד השבת.
לסיכום: אין דער משנה האבן מיר געלערנט די דינים וואס זענען נוהג ביי אנשי משמר, ביי אנשי בית אב און ביי אנשי מעמד במשך פונעם גאנצן יאר: אנשי משמר מעגן וויין ביינאכט און זענען אסור אין אים ביי טאג, אנשי בית אב זענען אסור אין אים אי ביי טאג אי ביינאכט, און אנשי משמר און אנשי מעמד זענען אסור צו שנייַדן די האר און צו וואשן די גאנצע וואך - און אום דאנערשטאג איז זיי דערלויבט געווארן, מפני כבוד השבת.